Gjykata e shkallës së parë e Durrësit, ka liruar ditën e sotme drejtorin e Konvalishencës në Durrës, Ahmet Dodën, pas arrestimit që këtij të fundit ju bë pasi u ngarkua me përgjegjësinë e vdekjes së një oficeri policie nga prishja e ndërtesës së Konvalishencës në Durrës.
Në seancën e drejtuar pak minuta më parë, gjykatësi Paulin Cera ka ndryshuar kërkesën e Dodës për ndryshimin e masës “arrest me burg” në “detyrim paraqitje”.
Ahmet Doda u arrestua pas tërmetit të 26 nëntorit, pasi në shtëpinë e pushimit në Kovalishencë humbi jetën kryekomisari Bajram Hajdarmetaj. Ai akuzohet për “shpërdorim detyre” pasi nuk kishte bllokuar hyrjen në shtëpinë e pushimit të Ministrisë së Brendshme e cila ishte dëmtuar nga tërmeti i 21 shtatorit.
Dy javë më parë ish-kryeministri Berisha ka publikuar një mesazh që ka ardhur në adresë të tij që thotë se Arben Doda pritet të lirohet së shpejti pasi ai është djali i dajës së Taulant Ballës. Sipas denoncimit, ky person ka koordinuar fushatën e Ballës në Librazhd dhe Çermenikë.
VENDIMI I PLOTË
Gjykata, pasi çeli seancën gjyqësore, kreu verifikimin e prezencës së palëve dhe shqyrtoi aktet e fashikullit, provat dhe pretendimet e palëve, të cilët kërkuan:
Mbrojtësit e personit nën hetim: Zëvendësimin e masës së sigurimit personal nga ajo e “Arrestit në burg” në atë të “Detyrimit për paraqitje në policinë gjyqësore”.
Prokurori: Pranimin e kërkesës së kërkuesit. Përveç masës së sigurimit personal “Detyrim për tu paraqitur në policinë gjyqësore” kërkojmë të caktohet edhe masa e sigurimit “Pezullimi i ushtrimit të një detyre a shërbimi publik” parashikuar nga neni 242 i K.Pr.Penale.
PËR KËTË ARSYE
Gjykata u tërhoq në Dhomën e Këshillimit dhe si u kthye, në bazë dhe për zbatim të nenit 112 dhe 234, 242 dhe 260/2 të Kodit të Procedurës Penale,
VENDOSI
1. Pranimin e kërkesës.
2. Zëvendësimin e masës së sigurimit “Arrest në burg” të caktuar ndaj personit nën hetim Ahmet Doda, me vendimin penal Nr. 393/1, datë 17.12.2019 të Gjykatës së Rrethit Gjyqësor Durrës, me masën e sigurimit “Detyrim për tu paraqitur në policinë gjyqësore” parashikuar nga neni 234 i K.Pr.Penale, duke i caktuar edhe masën ndaluese “Pezullimi i ushtrimit të një detyre a shërbimi publik” parashikuar nga neni 242 i K.Pr.Penale.
3. Urdhërohet personi nën hetim Ahmet Doda të paraqitet në Prokurorinë pranë Gjykatës së Shkallës së Parë Durrës, të Hënën e parë të çdo muaji, ora 10:00.
4. Urdhërohet lirimi i menjëhershëm i personit nën hetim Ahmet Doda nga IEVP Durrës, nëse nuk mbahet për ndonjë shkak tjetër ligjor.
5. Kundër këtij vendimi mund të bëhet ankim brenda 5 ditëve në Gjykatën e Apelit Durrës.
