Projektligji i hartuar nga Ministria për të Drejtat e Njeriut dhe Pakicave Etnike, për simbolet kombëtare, është votuar ditën e sotme me 41 vota pro. Ky projektligj u garanton shqiptarëve të Malit të Zi, përdorimin e lirshëm të flamurit kombëtar dhe simboleve të tjera shqiptare.
Miratimi i këtij projektligji është përshëndetur nga shumë qeveritar, përfshi ish-ministrin e Jashtëm, Ditmir Bushati. Përmes një statusi në rrjetin social “Facebook”, ai përgëzon të gjithë shqiptarët të cilët jetojnë atje.
Ditmir Bushati shkruan:
Mali i Zi miratoi ligjin për zgjedhjen, përdorimin dhe shfaqjen publike të simboleve kombëtare, përmes të cilit u garantohet pakicave kombëtare e drejta dhe liria e zgjedhjes, përdorimit dhe vendosjes publike të simboleve kombëtare, si dhe shënimi i festave kombëtare.
Miratimi i këtij ligji i jep fund praktikës së kushtëzuar të shfaqjes dhe përdorimit të flamurit dhe simboleve kombëtare. Ligji garanton gjithashtu shënimin e festës kombëtare në ato komuna ku shqiptarët përbëjnë 5% te popullsisë.
Përgëzime partive politike shqiptare në Malin e Zi, të cilët për një kohë të gjatë kanë insistuar në miratimin e këtij ligji. Një sukses i përbashkët që vjen nga qartësia në avancimin e kërkesave të drejta dhe ndërtimi i koalicioneve largpamëse në Malin e Zi. Uroj që ky shembull të shërbejë si precedent për t’i mundësuar shqiptarëve në Preshevë, Medvegjë e Bujanovc përdorimin e simboleve kombëtare dhe arsimimin në gjuhën amtare!/Fjala.al
