Mesfushori i Barcelonës, Arturo Vidal, është në një situatë shumë të keqe me katalanasit dhe largimi i ti duket si zgjidhja më e mirë e mundshme.
Kiliani pritet që të bëhet pjesë e klubit italian të Interit gjatë merkatos së janarit dhe të largohet nga La Liga, ku kohët e fundit duket se nuk e ka gjetur shumë veten.
Ish-lojtari i Bayern dhe Juventus duket se është në një gjendje “lufte” me Barçën, pasi siç raporton “ABC” së fundmi ka pasur diskutime edhe për bonuse të kontratës së tij. Vidal ka marrë nga katalanasit vetëm 1.7 milionë euro bonuse nga 4.1 milionë që parashikoheshin në kontratë dhe që duhet t’i kishin kaluar mesfushorit vitin e kaluar.
Ky lajm, aspak i mirë për kilianin, duket se ka gëzuar Antonio Konten e Interit, i cili kërkon që ta marrë sa më shpejt lojtarin e Barcelonës.
Ndonëse Messi dhe Valverde e duan pranin e mesfushorit në skuadër, drejtuesit e katalanasve duket se nuk e kanë trajtuar siç duhet atë. Bonusi ishte “molla” e dytë e sherrit brenda këtij muaji, pasi Vidal reagoi keq ndaj klubit për faktin se nuk ishte titullar në derbin me Real Madridin./Përgatiti: Fjala.al/
