Kryeministri i Malit të Zi, Dushko Markoviç ka reaguar ashpër për sulmin ndaj ambasadës së vendit të tij në Beograd, e cila ra pre e një sulmi të huliganëve serbë.
“Mali i Zi po përballet edhe një herë me sfidën e mbrojtjes së pavarësisë dhe lirisë”, deklaroi kryeministri Dushko Markoviç, duke theksuar se do të mbrojë vendin e tij nga aktorë të brendshëm dhe të jashtëm që kërkojnë destabilitet.
Mjete piroteknike janë hedhur në drejtim të godinës ku ndodhen zyrat e ambasadës në Beograd mbrëmjen e djeshme.
Një pjesë e flamurit të Malit të Zi është dëmtuar nga flakët, ndërkohë që stafi ka bërë ndërrimin e menjëhershëm.
Në Malin e Zi situata është tensionuar ndjeshëm pas vendimit të Parlamentit për të kaluar një ligj për komunitetet fetare.
“Me këtë ligj Podgorica synon të përvetësojë pronat e Kishës Ortodokse”, janë disa nga deklaratat dhe pretendimet e komunitetit serb në Mal të Zi dhe zyrtarëve në Beograd.
