Baza ushtarake e Shteteve të Bashkuara të Amerikës në Lamu të Kenias ëstë sulmuar nga grupi militant i “Al Shabaab”.
Kjo bazë ushtarake që përdoret nga forcat amerikane dhe ato vendase duket se është sulmuar për më shumë se katër orë.
Ndërsa nga ushtria keniane bëhet me dije se katër nga agresorët janë vrarë dhe se është duke vazhduar përballja me militantët.
“Ata e kanë sulmuar pistën Manda në Lamu, e cila ndodhet pranë kampit ushtarak me personel të huaj nga shumë vende, përfshirë Shtetet e Bashkuara. Kemi informata se luftimet ende janë duke vazhduar”,- ka thënë për Reuters një burim nga ushtria.
Sipas po të njëjtit burim shtohet se sulmuesit po tentojnë që të afrohen me bazën ushtarake me anë të pistës.
Përgjegjësia e këtij sulmi ndaj ushtrisë së SHBA-ve dhe asaj keniane e mori grupi i Al Shabaab: “Një grup elitë i ushtarëve të brigadës Al Mujahideen e ka nisur një sulm të guximshëm ndaj një baze ajrore amerikane”,-thuhet në deklaratën e grupit militant.
Ky sulm ka filluar që në mëngjes dhe prej katër orësh është ende duke vazhduar. Ende nuk ka raportime për të vrarë apo të lënduar nga radhët e SHBA-ve e të Kenias, ndërsa grupi militant shtoi se ka arritur të shkatërrojë shtatë aeroplanë dhe tre automjete ushtarake në këtë sulm.
Ky sulm vjen një vit pas atij vetëvrasës në kryeqytetin e Kenias, Nairobi, ku mbetën të vrarë plot 21 persona./Fjala.al/
