Oficeri i policisë së Shkodrës që u sulmua mbrëmë me tritol nuk është thjesht një punonjës policie. Ai është një shkrimtar i njohur. Një figurë intelektuale komplekse që rrallë gjendet në radhët e bluve.
I njohur si studiues, autor i disa librave, që në qendër kanë histori dhe figura kombëtare, Prelë Milani është një zë i rrallë anti-kanabis në vend. Ndonëse në radhët e policisë, asaj policisë që rezultoi e implikuar deri në rang ministrash, drejtorësh e deri shefa sektorësh në të gjithë vendin, ai gjithnjë doli kundër kanabizimit. Madje kundër kanabizimit të Thethit të ‘tij’.
Ai gjithnjë bëri thirrje që zona e vet, që njihet si një ndër zonat më të bukura malore të vendit, të mos e mbillte rrënjën që bën të pasur trafikantët e vret njerëzit dhe ata vetë me njëri-tjetrin.
Banesa e tij në lagjen Guerrile të Shkodrës u sulmua mbrëmë më tritol duke dhënë sinjalin e duhur që oficeri i policisë dhe intelektuali i krahinës të mos hap më zë goje kundër mbjelljes së drogës.
Sipas të dhënave policia është fokusuar konkretisht në këtë pikë ku po kërkohen shkaqe dhe autorë. Po ashtu edhe Prokuroria ka kërkuar të hetojë të gjitha konfliktet që mund të ketë pasur gjatë ushtrimit të detyrës së tij shefi i postës policore të Thethit.
Milani ishte ndër të paktët oficerë policie që u ngrit mbi palët dhe rreth një vit më parë ai doli kundër gjithë politikës dhe qeverisë konkretisht për shkak të kanabizimit të zonës së tij. Ai i kërcënoi një vit më parë banorët e Dukagjinit bashkë me mbështetësit e tyre politik e jo vetëm.
Si duket afrimi i stinës së mbjelljes ka bërë që Prelë Milani të shënjestrohet nga trafikantët duke i përcjellë mesazhin e mosreagimit kundër punës së tyre me drogën.
Oficeri një vit më parë shkruajti: “Vitet 2017-të e 2018-të kanë qenë vitet e një luftë të fituar ndaj kanabisit në Dukagjin, Shkodër, dhe në shkallë vendi.
Ata që mendojnë se polica mund të humbë fitoret e arritura gabohet rëndë. Më Ramën e pa Ramën, me Bashën e pa Bashën, me zgjedhje e pa zgjedhje, kanabisi do vijojë të luftohet pa kompromis. Ju që e mbani gjarprin kulaç në gji u këshilloj hiqeni fluturim pasi sa te nxehet koha do t`ju kafshojnë të parët ju që iu bëtë strehë.
Ju që farën e keqe e keni hedhur në kubikë dhe e mbani të fshehur birave, do t’ua hajë dreqi para se ta mbjellni në ugar. Ju që mendoni se do rrisni dreqin në djep mos u lodhni, mos u shpenzoni se nuk do ta korrni!
Edhe po u korr ndopak, nuk do e shini as nuk do e çoni në mulli pa shkuar atje ku do hani bukë falë”. /Fjala.al/
