Kreu I PD-së ka dhënë një deklaratë për mediat para takimit në selinë blu. Në fjalimin e tij ai i përgjigjet kryeministrit Edi Rama, i cili nga Vjena tha se kriza politike në Shqipëri është artificiale.
Basha tha se vendi është në krizë të thellë politike, ndërsa përsa i përket ndryshimit të sistemit zgjedhor, kreu i opozitës u shpreh se çdo sistem që do të zgjidhet do të dështojë, nëse nuk garantohet dalja e politikës nga krimi.
Basha theksoi se PD është e gatshme të ndërmarrë çdo hap të nevojshëm për nxjerrjen e vendit nga kriza.
“Ne emër te Partisë Demokratike dhe Opozitës së Bashkuar kam qenë dhe mbetem i hapur për të diskutuar, në mënyrë transparente dhe gjithëpërfshirëse, bashkë me qytetarët shqiptarë, sistemin zgjedhor që duhet të aplikohet në Shqipëri për zgjedhjet parlamentare.
Nisur nga praktika e keqe e 7 viteve te fundit, unë besoj se cilido sistem zgjedhor do të dështonte të rriste cilësinë e përfaqësimit dhe llogaridhënies nëse nuk sigurojmë dot shkëputjen e politikës nga krimi, blerjen e votave me paratë e pista, dhe ndëshkimin nga drejtësia e pavarur të krimeve elektorale.
Pa garantuar këto standarte minimale, fshehja pas alibisë që “fajin e ka sistemi”, është thjesht një shtojcë në propagandën e Ramës, që ne jemi te gjithë njësoj dhe qe faji është gjithmonë diku tjetër, kur në fakt është ai që kandidoi persona me rekorde kriminale dhe u kap në përgjime duke blere votat me krimin.
Unë zgjedh të besoj Bundestagun dhe jo Ramën. Vendi është në një krizë të thellë politike. Këtë shqiptarët e ndjejnë në lëkurën e tyre. Këtë shqiptarët e ndjejnë në mungesën e theksuar të shtetit. Sot janë braktisur mijëra familje. Pushteti i tij personal e ka zhytur vendin në një krize legjitimiteti. Axhenda ime është ekonomia, dinjiteti dhe mirëqenia e çdo shqiptari. Në funksion të kësaj jemi gati të hedhim çdo hap”, tha Basha.
Sa i përket konfliktit SHBA-Iran, kryetari i Partisë Demokratike tha se si ministër i Jashtëm ishte krenar që e rreshtoi Shqipërinë krah NATO-s dhe SHBA-ve.
“Liria dhe demokracia kanë një çmim të lartë. Shqiptarët e kanë kuptuar se pa luftuar për demokracinë ajo rrezikon të zhduket. Unë jam krenar që si Ministër i Jashtëm kam rreshtuar Shqipërinë krah NATO-s. Jemi përkrah SHBA dhe vlerave të lirisë dhe demokracisë”, përfundoi Basha.
