Ndodh edhe kështu. Në punë, teksa ha me kolegun vaktin e drekës, ai të hedh një lloj helmi vdekjeprurës. Është një histori që ka ngjarë kosh më parë. Dhe ka ndodhur në Gjermani. Mediet gjermane tregojnë se një 26-vjeçar, i cili u helmua nga kolegu i tij i punës duke i hedhur acetat plumbi në sanduiç, vdiq pas tre vjetësh në gjendje kome.
Pas vdekjes, gjykata vendosi, me kërkesën e prokurorëve, që trupi t`i nënshtrohej autopsisë në rast të hapjes së një procesi gjyqësor të ri, tha zëdhënësi i gjykatës Bielefeld, Guiskard Eisenberg, për media gjermane.
Autori i helmimit, 57-vjeçari Klaus O., u arrestua në flagrancë, dy vite më parë, ndërsa përpiqej të përsëriste operacionin në dëm të kolegëve të tjerë në fabrikën e bojërave në Schloss Holte-Stukenbrock.
Vitin e kaluar ai u dënua me burg të përjetshëm për tentativë vrasjeje. Menjëherë pasi hëngri sanduiçin, 26-vjeçari kishte filluar të përjetonte dhimbje stomaku. Gjendja e tij ishte përkeqësuar deri në atë pikë sa të kërkonte transport urgjent për në spital, ku ai mbeti në gjendje kome deri në ditën e vdekjes.
Me gjithë kujdesin e personelit shëndetësor, i riu në kushte jashtëzakonisht të rënda, humbi jetën pas një agonie të gjatë. Autori i vrasjes së tij, 57-vjeçari i njohur me emrin Klaus O., tashmë është pas hekurave. Pas asaj që ndodhi në vitin 2016, hetuesit kishin filluar menjëherë hetimet, duke arritur te fajtori falë pamjeve të kamerave të sigurisë.
Në video, hetuesit kishin parë qartë burrin duke marrë drekën e kolegut të tij për të hedhur më pas helmin vdekjeprurës brenda. Gjatë hetimit, oficerët e policisë zgjeruan hetimet edhe për vdekje të tjera të dyshimta dhe të parakohshme që kishin ndodhur në mesin e punëtorëve të së njëjtës kompani.
Vdekjet, që të gjitha, dyshohet se ishin shkaktuar nga helmimi i metalit. Sipas medieve gjermane, të paktën 21 punëtorë të tjerë vdiqën nga shkaqet e veshkave, sulmet në zemër ose tumoret që mund të ishin shkaktuar nga substancat e administruara nga Klaus O.
Acetati i plumbit është një substancë shumë toksike dhe pothuajse pa shije që dëmton rëndë organet. /Fjala.al/
