Ekspozita “Një skedar apo ndoshta dy – Mënyrat e Fotografimit” e artistit Armin Linke, kuruar nga Matteo Balduzzi hapi sezonin artistik në Muzeun Kombëtar të Fotografisë “Marubi” në Shkodër.
Muzeu i Fotografisë Bashkëkohore i Milano-Cinisello Balsamo-s dhe Muzeu Kombëtar i Fotografisë “Marubi” prezantuan ekspozitën e Armin Linke-s, një ndër artistët italianë më interesantë e të afirmuar në skenën ndërkombëtare.
Kjo ekspozitë është pjesë e projektit Immagini e testi – Notazioni visive, i promovuar nga Muzeu i Fotografisë Bashkëkohore së bashku me Armin Linke, falë mbështetjes së Italian Council (Edicioni V, 2019), program i Drejtorisë se Përgjithshme për Kreativitet Bashkëkohor të Ministrisë së Trashëgimisë, Aktiviteteve kulturore dhe Turizmit të Italisë për promovimin e artit bashkëkohor italian në botë.
E pranishme në hapjen e ekspozitës, ministrja e Kulturës, Elva Margariti shprehu kënaqësinë që ky sezon i ri artistik nis pikërisht në Shkodër, në Muzeun Marubi, të cilin e cilësoi një prej muzeve tanë më të rinj dhe me më shumë vizitorë. Margariti theksoi se sezoni nis me prezantimin e veprës së një tjetër artisti që vjen nga Italia, i cili ndërthur imazhin me fjalën.
“Në këtë mënyrë ky muze ndërthur të shkuarën e të tashmen dhe një hapësirë diskutimi mbi fotografinë dhe artin në përgjithësi.
Uroj dhe shpresoj që vepra e Armin Linke të mund të gjenerojë të tjerë rrathë komunikimi dhe diskutimesh”, tha Margariti.
