Zjarri që pushtoi Australinë solli shkatërrime të mëdha në këtë kontinent duke sjellë humbjen e dhjetëra njerëzve, gjysmë miliardi jetë kafshësh e mijëra hektarë pyje.
Ashtu siç pritej, ky zjarr ka ndikuar edhe te turneu i parë Grand Slem të tenisit botëror që do mbahej në këtë vend.
Organizatorët e Australian Open kanë pezulluar përkohësisht ndeshjet, pasi disa tenistë patën probleme me frymëmarrjen për shkak të tymit e ajrit të ndotur.
Tenistja Dalila Jakupovic u tërhoq nga sfida pasi pati një krizë në frymëmarrje gjë që e rrëzoi në tokë,pak para kësaj ndodhive një prej personave që merrej me kapjen e topave humbi ndjenjat dhe po ashtu edhe Maria Sharapova shtyu ndeshjen e saj.
Kjo situatë detyroi organizuesit e kompeticionit që të pezullonin përballjet e së hënës, ndërsa kanë rinisur sërish ditën e sotme, por me disa rregulla të tjera.
Me rregullat e reja tenistët azhurnohen me normat e matjes së ajrit përpara ndeshjeve, ndërsa arbitrave u jepet e drejta për t’i ndërprerë për të mbrojtur shëndetin e të gjithëve.
Situata e krijuar nga zjarri ka sjellë një sërë reagimesh nga tenistët, të cilët janë ankuar për kushtet dhe për drejtuesit që i detyrojnë të luajnë në këtë situatë.
Organizatorët e Australian Open e kanë quajtur si të pamendueshëm shtyrjen e turneut të parë Grand Slam të këtij viti,pavarësisht se nga sportistët ka një sërë akuzash./Fjala.al/
