Presidenti i Kosovës, Hashim Thaçi ka dhënë shenjat e para se do të dekretojë, Albin Kurtin si kryeministër.
Kreu i shtetit është shprehur se ai tashmë ka fakte të mjaftueshme për të mandatar Albin Kurtin në krye të qeverisë së Kosovës.
“Jam duke menduar se do ta pranojë sepse është një rregull i pashkruar se në momentin kur Kryetari i Partisë së Parë, e ka mandatuar Partia, e ka nominuar më shumë se gjysmën e Qeverisë, në konsultim e sipër edhe në kuptim zyrtar merr nominimin. E kam nënshkruar nominimin si Kryeministër i ardhshëm i Republikës së Kosovës. Shpresoj se nuk do të kalojë kohë e gjatë dhe z. Kurti të pranojë mandatin. Në rrethana tjera mund ta deklarojë refuzimin”, është shprehur Thaçi pas takimit me William Wolke.
Sipas Thaçit, qytetarët e Kosovës dhe partnerët ndërkombëtarë po presin që të ngrihen institucionet e reja.
Për këtë arsye, Thaçi ka kërkuar që Albin Kurti të pranojë ose të refuzojë krijimin e qeverisë së re, bazuar në zgjedhjet parlamentare të 6 tetorit të vitit të kaluar.
Tani topi është në fushën e kreut të Vetëvendosjes, Albin Kurti i cili do të duhet të përgjigjet shpejt në krijimin e qeverisë së re të Kosovës, siç pati premtuar pas zgjedhjeve të 6 tetorit, se do të nënshkruante marrëveshjen me koalicionin qeverisës, madje jo më shumë se 100 orë pas certifikimit të zgjedhjeve të 6 tetorit.
Ndërkaq, Lëvizja Vetëvendosje dhe Lidhja Demokratike kanë dështuar të arrijnë një marrëveshje edhe pse ka tre muaj që kur kanë përfunduar zgjedhjet.
Të dyja partitë nuk kanë arritur të dakordësohen për kreun e Kuvendit të Kosovës, ndërsa vendi vijon të funksionojë prej gjashtë muajsh, me qeveri në dorëheqje./Fjala.al/
