Nga /Fjala.al/
Rrëmbimi i Jak Prengës në Kamëz vazhdon të jetë mister, jo vetëm fati i tij po edhe motivi dhe autorët. Ndërsa policia pretendon se po punon për zbardhjen e ngjarjes, ditën e premte, rreth orëve të para të pas mesditës, në Shkallnur është lajmëruar për një zjarr.
Zjarrfikëset kanë zbuluar se aty po digjej një mjet i braktisur dhe që i përkiste markës Land Rover. Prej momentit kur është pikasur mjeti, policia ka dyshuar që iu përket rrëmbyesve të Prengës por kanë vendosur të mos flasin.
Hetimet nuk kanë zbardhur asnjë detaj. Mjeti mësohet se është i djegur tërësisht dhe s`ka asnjë të dhënë identifikuese.
Rrëmbimi i Jak Prengës, ndodhi vetëm pak çaste para se ky mjet të gjendej i djegur. Por askush nuk e bëri të ditur këtë fakt! Policia dështoi në ndjekjen e autorëve të rrëmbimit, duke humbur gjurmët edhe pse ngjarja ndodhi në mes të ditës.
Dyshimet e para flasin për një borxh të pashlyer të të rrëmbyerit, ndërkohë që sherri ka nisur për një makinë të blerë nga ana e tij.
Autorët pasi janë përplasur fizikisht në mes të Kamzës me Prengën e kanë rrëmbyer në sytë e dhjetëra kalimtarëve dhe e kanë futur në mjet me të cilin mësohet se kanë marrë rrugën e vjetër të Durrësit, rrugë që është lehtësisht e kontrollueshme nga policia, sidomos kur dalin për vjelje gjobash!
