Presidenti i klubit të Kukësit, Safet Gjici, ka befasuar të gjithë me vendimin e fundit, ku ka bërë me dije se është tërhequr nga strukturat drejtuese të verilindorëve.
Shkak për këtë vendim të tij Gjici ka bërë angazhimet e shumta në bashkinë e qytetit dhe mospasjen e kohës së mjaftueshme.
Në një prononcim për “Top Channel”, ai nuk ka zbuluar ende se kujt ia ka besuar drejtimin e klubit, por ndërkohë që preferon të quhet president nderi.
I pyetur në lidhje me gjendjen e skuadrës dhe pikën e dobët të tyre, Gjici është shprehur se skuadra është shumë e mirë, por sipas tij penalizohet nga kushtet dhe mungesa e fondeve.
‘’Skuadra është në formë mjaft të mirë, dhe mesa me kanë komunikuar drejtori dhe trajneri lajmi pozitiv është që nuk kemi pasur dëmtime. Ne penalizohemi sepse nuk kemi stadiumin tonë dhe na është dashur për dy vite, pra sezonin e kaluar dhe këtë aktual ta luajmë në stadium të ndryshme’’-deklaroi ai.
Më tej kreu i Bashkisë së Kukësit foli si politikan, por dashuria për klubin e bëri që në fjalën e tij të pranonte se institucioni që drejtohet nga ai, as më parë e as tani nuk e ka financuar skuadrën.
‘’Unë jam president nderi sepse posti im tani është kryetar bashkie. Në të vërtetë bashkia ka disa aksione në klub por realiteti është që asnjëherë nuk kanë pasur kapacitetin për të financuar për klubin, as më parë e as tani ndaj duhet të pranoj që për dikë që financon është sforco e madhe’’-vijoi Safet Gjici.
Ndërsa i pyetur për rivalin direkt, Gjici vlerësoi Tiranën e Bylisin por Partizani sipas tij mbetet ekipi për t’u mundur.
‘’ Mendoj se deri në fund të kampionatit do rivalizojmë me Partizanin. I ftoj tifozët të jenë prezent në stadiumin e ri aty ku do të ndeshemi me ta dhe të na mbështesin. Të vijnë jo vetëm për të parë Air Albaninan por për të shijuar një ndeshje që unë mendoj se do jetë spektakolare’’-tha ndër të tjera Kryetari i Bashkisë së Kukësit./Fjala.al/
