Kryeministri ende në detyrë i Kosovës, Ramush Haradinaj vijon të lëshojë akuza ndaj homologut në Shqipëri, Edi Rama.
Në një intervistë për “Insajderi”, Haradinaj ka treguar se nuk ka komunikuar me Ramën që prej pranverës së 2019-ës, ndërsa ditën e tërmetit, më 26 nëntor, kreu i ekzekutivit shqiptar nuk i është përgjigjur në telefon.
“I kam bërë një telefonat në ditën që ndodhi tërmeti e kam thirrur por nuk është përgjigjur dhe prej atëherë nuk kam provu me thirrë ose diçka tjetër”, është shprehur Haradinaj.
Më tej, Ramush Haradinaj ka vijuar me akuzat për mbështetjen që, sipas tij, Rama i ka dhënë idesë së ndryshimit të kufijve të Kosovës.
“Ka qenë i angazhuar kryeministri Rama në opsionin e marrëveshjes Kosovë-Serbi, i njohur si shkëmbim i territoreve – por që do të rezultonte me ndarje të Kosovës. Zotëri Rama ka qenë i kyçur që në inicimin e kësaj mënyrë të marrjes vesh jo vetëm Kosovë-Serbi, por edhe një marrëveshje paqeje shqiptaro-serbe”, është shprehur ndër të tjera Haradinaj.
Rama ka depozituar më herët një padi për shpifje kundër Haradinajt për shkak të akuzave që i ka bërë për këtë çështje./Fjala.al
Fluturimet Prishtinë-Beograd/ Rama përshëndet me ‘kunjë’ për Haradinajn
