Sot shënohen 9 vite nga vrasja e 4 protestuesve të opozitës.
Deri më sot drejtësia nuk e ka thënë fjalën e saj për të vendosur të gjithë autorët e atij krimi para drejtësisë.
Në përvjetorin e kësaj ngjarje tragjike, ish-ministri i Jashtëm, Ditmir Bushati e quan një turp kombëtar faktin që nuk është vendosur drejtësi përgjatë këtyre 9 viteve për viktimat e 21 janarit.
Duke përmendur 100-vjetorin e Kongresit të Lushnjës që sipas Bushatit na nderon, përvjetori i ndarjes nga jeta i Ibrahim Rugovës na dhemb të gjithëve. Ndërsa 21 janari përbën edhe turpin tonë kombëtar.
Postimi i plotë i Bushatit: I pari na nderon. 100 vjetori i Kongresit të Lushnjes është dëshmi e maturisë politike të njerëzve të mençur që ditën të bëhen bashkë për fatet e Shqipërisë në momente kritike.
I dyti na dhemb. Pasi lidhet me ndarjen nga jeta të Ibrahim Rugovës, në 2006-ën. Personalitetit që udhëhoqi rezistencën ndaj Serbisë e që ndërkombëtarizoi çështjen e Kosovës.
I treti na turpëron. Sepse më 21 Janar 2011, shteti vrau 4 protestues të pafajshëm dhe drejtësia ende nuk e ka thënë fjalën e saj./Fjala.al/
