Si çdo vit edhe sivjet familjarët e “21 janarit” kanë ardhur në Tiranë. Ata janë thirrur në një përkujtimore për katër viktimat e asaj ngjarjeje të rëndë që tronditi vendin.
Gazeta ‘Fjala’ kontaktoi me Mark Nikën, xhaxhanë e Aleks Nikës, viktimës së katërt të asaj ngjarjeje. Ai rrëfeu se do të merrte pjesë në ceremoninë që ka organizuar qeveria por që tashmë nuk ka më asnjë arsye të kërkojë të japë shpjegime për çështjen e vrasjeve të 21 janarit.
Çdo 21 janar opozita e atëhershme dhe qeveria e sotshme mblidhet në bulevard, bashkë me familjarët e të ndjerëve dhe përkujtojnë Ziver Veizin, Faik Myrtajn, Hekuran Dedën dhe Aleks Nikën.
Sot, në ceremoni mungon kryeministri Rama, ai që në fakt e ka organizuar për 7 vite me radhë. Në vendin e vrasjes së 3 viktimave dhe plagosjes së Aleks Nikës zyrtarë të lartë të Partisë Socialiste vunë lule.
Bashkë me ta ishin edhe pjesëtarët e katër familjeve që humbën njerëzit në atë protestë të 21 janarit të 2011, protestë që përfundoi tragjikisht për katër jetë.
Çdo vit flitet shumë për atë ngjarje, për gjyqe e beteja ligjore, ndërkohë që në fakt për atë ngjarje nuk është dënuar ende asnjë person, nga “grupi i zjarrit” që u tha se qëlloi mbi turmën që kishte ardhur në mbështetjen e Partisë Socialiste, opozitë aso kohe.
Para dy viteve dosja u rikthye sërish në gjykatë. Familjarët vijojnë që të kërkojnë drejtësi, apel të cilin ata e përsërisin çdo vit duke pasur shpresë se drejtësia e re do bëjë drejtësi për katër të vrarët.
Organet e reja të drejtësisë që janë ngritur dhe po ngrihen janë shpresa e fundit e familjarëve për të hetuar në mënyrë shteruese dhe të paanshme ngjarjet e 21 Janarit, duke vënë protagonistët para përgjegjësisë. Bëhet fjalë për Byronë Kombëtare të Hetimit, Prokurorinë Speciale dhe Gjykatat e Posaçme.
Kushtetuta e re dhe ligji për SPAK ka hequr kufizimet kohore për Byronë e Hetimit dhe Prokurorinë Speciale, për hetimin e çështjeve të ndryshme, sidomos kur të implikuar janë funksionarë dhe ish-funksionar të lartë. Komisionet e Vettingut shkarkuan disa nga gjyqtarët dhe prokurorët e dosjes së 21 janarit. /Fjala.al/
