Ndeshja Tirana-Bylisi mbylli javën e 18-të të Kategorisë Superiore, pas asaj midis Luftëtarit dhe Kukësit në Gjirokastër.
Ndeshja midis verilindorëve dhe gjirokastritëve u mbyll me barazimin e bardhë 0-0 dhe të dyja skuadrat dolën me nga një pikë. Ajo që dukej një ndeshje shumë e lehtë për skuadrën e Kukësit në fakt rezultoi të ishte një nga më të vështirat. Ndërsa, Luftëtari nga ana tjetër mundi që në këtë fillim viti të mbante të paprekur portën e tij.
Takimi i zhvilluar në stadiumin “Selman Stërmasi” nga ana tjetër ishte plot aksion nga të dyja skuadrat. Tirana dhe Bylisi mund të thuhet se kanë zhvilluar një ndeshje të barabartë duke luajtur sa nga njëra anë e fushës tek tjetra.
Pjesa e parë e lojës u mbyll me vetëm një gol nga bardheblutë, që u realizua nga Elton Cale në minutën e 17-të të ndeshjes. Ndërsa, u desh minuta e 64-të e lojës që ekipi i Bylisit të arrinte të merrte barazimin. Të dyja skuadrat patën mundësi të shumta për të shënuar, por golat ishin të paktë.
Vetëm në minutat shtesë Michael Ngoo arriti që të merrte fitoren për ekipin e Tiranës dhe t’i jepte avantazhin e fundit të kësaj përballjeje skuadrës së tij. Pas kësaj ndeshjeje bardheblutë kaluan në vend të dytë me 31 pikë dhe vetëm një pikë diferencë nga Kukësi i vendit të parë, ndërsa Bylisi zbriti në pozicionin e tretë me 30 pikë./Fjala.al/Katerina Tafa/
