Ambasada e Iranit po nxjerr në shitje asetet që ka në vendin tonë. Mësohet se një tokë që ishte në pronësi të ambasadës në Tiranë është nxjerrë në shitje.
Marrëdhëniet me Republikën Islamike kanë marrë një goditje të fortë vitet e fundit, pasi Shqipëria vendosi të pranojë 3000 muxhahedinë që konsiderohen opozita e regjimit në Teheran. Me dëbimin e ambasadorit dhe një diplomati në vitin 2018, si dhe me largimin para pak javësh të dy diplomatëve të tjerë, marrëdhëniet kanë arritur në nivelin më të ulët. Diplomatët janë akuzuar se ndërmerrnin veprimtari që ishin jashtë statusit të tyre diplomatik.
Me vrasjen e gjeneralit Qasem Soleimani nga forcat amerikane më 3 janar të këtij viti, Shqipëria u përfshi edhe në deklaratat e liderit suprem iranian, Ajatollah Ali Khamenei, i cili foli për “një vend djallëzor në Evropë” që bashkëpunon me SHBA-në dhe Izraelin. Deklaratave kërcënuese të Teheranit, Tirana iu përgjigj duke theksuar anëtarësinë e saj në NATO dhe më pas duke dëbuar diplomatët.
I gjendur në këtë situatë, Irani duket se po zvogëlon gjithnjë e më shumë prezencën në Shqipëri. Në tokën që është nxjerrë në shitje ishte planifikuar të ndërtohej rezidenca e ambasadorit, por planet janë anuluar.
Ministria e Jashtme iraniane i është drejtuar me një kërkesë Qeverisë së saj për të shitur hapësirën që zotëron në Tiranë. Sipas Ministrisë, toka nuk është përshtatshme për të ndërtuar godinë diplomatike, raporton Fjala.al.
Nga Uashingtoni kanë ardhur vazhdimisht sugjerime jo-zyrtare që Shqipëria dhe vende të tjera ku ka patur kërcënime për sulme terroriste nga aktorë iranianë, të mbyllin ambasadat e Iranit. Gjithsesi, një vendim i tillë nuk është marrë ende në Evropë, përfshirë Tiranën, ndonëse kjo e fundit ka bërë lëvizje të forta për të kufizuar veprimtarinë e Iranit në vend.
k.s/Fjala.al
