Java e 21-të e Serisë A nuk rezultoi aq e lehtë sa u duk fillimisht për zikaltërit e Interit. Ekipi i drejtuar nga trajneri Antonio Conte nuk ka arritur që të fitojë as në ndeshjen me skuadrën e Cagliarit.
Takimi me skuadrën e vendit të gjashtë të kategorisë më të madhe të sportit në Itali ka rezultuar të jetë e vështirë për Interin e vendit të dytë dhe është mbyllur me barazimin 1-1.
Skuadra e parë që kaloi në avantazh ishte ajo e Contes, e cila arriti që të shënonte në minutën e 29-të me anë të Lautaro Martinez, i cili po ashtu do të ndëshkohej në minutat shtesë të ndeshjes duke marrë karton të kuq.
Megjithatë, avantazhi i zikaltërve zgjati deri në minutën e 78-të të lojës, pasi Radja Nainggolan arriti që të barazonte rezultatet për ekipin e Cagliarit.
Kujtojmë se nga kjo ndeshje Interi vazhdon të mbetet në vend të dytë, duke iu shkëputur me një diferencë prej tre pikësh nga vendi i parë që momentalisht mbahet nga Juventus.
Rikujtojmë se dhe java e 20-të ishte jo e frytshme për zikaltërit, të cilët mundën të merrnin vetëm barazim nga skuadra e Lecce-s e vendit të 17-të./Fjala.al/Katerina Tafa/
