Një ndeshje plot vuajtje ishte kjo e sotmja për skuadrën e Partizanit. “Demat” e kryeqytetit u mundën me rezultatin 1-0 nga Kukësi në stadiumin “Air Albania”.
Aksione të shumta, përballje kokë më kokë dhe plot raste të humbura pati sonte në ndeshjen e cilësuar si supersfida e javës së 19-të e Kategorisë Superiore.
Skuadra e Kukësit arriti që të mbante topin në pjesën më të madhe të lojës, por pavarësisht kësaj rezultati u zhbllokua vetëm në minutën e 67-të, ku Kristal Abazi bëri një goditje fantastike te porta e të kuqve. Abazaj mund të quhet pa frikë edhe si një nga lojtarët më të mirë të mbrëmjes, ku përveç golit dha shumë në sulmet e verilindorëve te porta e Partizanit.
Shanset për të shënuar ishin të shumta edhe për kampionët ende në fuqi, por nuk u shfrytëzuan siç duhej.
Megjithatë, duhet theksuar se kjo përballje ishte një nga më të bukurat dhe më emocionueset e kësaj jave, ku këmbëngulja pa ndalim e të dyja skuadrave bëri që të takimi të ishte një garë shumë e fortë.
Emra si Shkurtaj i Kukësit, apo Solomoni i Partizanit dhanë shumë duke vrapuar pa ndaluar asnjë sekondë pas topit. Rezultati vendosi të dallonte se kush ishin më të mirët e mbrëmjes dhe verilindorët morën një fitore të merituar.
Kukësi iu rikthye fitores pas barazimit të turpshëm 0-0 javën e kaluar në ndeshjen me skuadrën e Luftëtarit. Ndërsa, Partizani nga ana tjetër nuk po arrin të marrë veten duke humbur ndeshjet radhazi, ku duket se rikthimi i Adolfo Sormani-t në stolin e tyre nuk po ka asnjë rezultat.
Me ndeshjen e sotme Kukësi vazhdon të qëndrojë në vend të parë me 35 pikë i ndjekur nga Tirana, e cila shkatërroi me rezultatin 5-1 skuadrën e Luftëtarit në stadiumin “Selman Stërmasi” dhe ka vetëm një pikë më pak se verilindorët, ndërsa vendin e tretë tashmë e ka marrë ekipi i Teutës me 31 pikë, pasi arriti të mposhte Bylisin 1-0./Katerina Tafa/ Fjala.al/
