Paralajmërimi i ardhur nga Turqia për një tërmet të mundshëm që mund të prekë këtë vend pas atij të pak ditëve më parë, sipas sizmologëve shqiptarë duhet parë më vëmendje.
Sizmologu Rrapo Ormeni ka theksuar se institucionet shqiptare duhet ta ‘mbajnë një sy hapur’, pas tërmetit të 26 nëntorit në Shqipëri, ku humbën jetën 51 persona dhe qindra të tjerë u plagosën, dhe pas tërmetit shkatërrimtar të pak ditëve më parë në Turqi.
Ormeni thotë se vendi ynë ka hyrë tashmë në një periudhë me aktivitet të lartë sizmik.
“Edhe Shqipëria duhet të ketë një sy hapur. Edhe në Shqipëri kemi pasur periudha me nivel sizmik të ulët siç ka qenë nga 79-2019 dhe periudha me aktivitet sizmik të lartë. Këto periudha përsëriten. Ne tani kemi hyrë në një periudhë me aktivitet sizmik të lartë. Këtë e tregoi tërmeti i Durrësit. Këto periudha kanë ciklet e tyre. Nëse periudha me aktivitet sizmik të ulët zgjat 40 vjet, periudha me aktivitet sizmik të lartë zgjatin 17-23 vjet”, u shpreh Ormeni për Ora News.
Shqipëria ka vijuar të goditet nga pas-lëkundje të shumta pas tërmetit të 26 nëntorit të vitit të kaluar. Ndërsa Turqia ka paralajmëruar për një tërmet edhe më të fuqishëm se ai që preku pak ditë më parë këtë vend.
Sipas autoriteteve turke, rrezja e tërmetit mund të arrijë deri në Itali dhe Austri, ndaj sizmologët shqiptarë kërkojnë që shteti shqiptar të jetë i vëmendshëm ndaj kësaj situate./Fjala.al/
