Çështjet e shumta që kanë mbetur në duart e SPAK detyruan kreun e saj pak ditë më parë të kërkonte shtim në organikë. Ai u justifikua me faktin që ka shumë punë dhe e kanë të pamundur me aq personel të vijohet në kohën e duhur me shqyrtimin e dosjeve.
Ai ka propozuar dy emra që kanë kaluar nga vetting-u dhe që gjenden në krye të prokurorive në rrethe.
Referuar të dhënave mësohet se drejtuesi i Prokurorisë së Posaçme, Arben Kraja, i ka propozuar Këshillit të Lartë të Prokurorisë dy emra konkret prokurorësh për t’u emëruar në Strukturën e Posaçme Kundër Korrupsionit dhe Krimit të Organizuar.
Burime bëjnë me dije se Kraja ka propozuar emrin e drejtueses së Prokurorisë së Beratit, Eloida Goxhi, e cila ka kaluar me sukses në shkallët e vetting-ut, dhe drejtuesin e Prokurorisë së Pogradecit, Sotir Kllapi, i cili po ashtu ka kaluar vetting-un pa asnjë problematikë.
Në mbledhjen e ditës së sotme të KLP-së pritet të shqyrtohet kërkesa e Krajës, i cili e ka bazuar shtimin e SPAK me dy prokurorë të tjerë për shkak të numrit të lartë të çështjeve të SPAK. n.k./Fjala.al/
