Prokuroria ka apeluar vendimin e gjykatës së Tiranës e cila shpalli të pafajshëm kreun e Partisë Demokratike, Lulzim Basha për financimet e dyshimta nga Rusia në favor të lobimit të tij në Shtetet e Bashkuara të Amerikës.
Duke iu përmbajtur afateve të apelimit të vendimit të gjykatës së Tiranës, prokuroria kërkon një proces tjetër ndaj kryedemokratit Lulzim Basha. Pjesë e procesit bashkë me Lulzim Bashën, janë edhe ish-sekretari i Përgjithshëm, Arben Ristani dhe financieri i selisë blu Ilir Dervishi. Të tre zyrtarët e PD-së edhe pse u shpallën të pafajshëm para dy javësh nga gjykata e Tiranës, do të jetë Gjykata e Apelit tashmë që do të shqyrtojë dosjen e Lulzim Bashës.
Akuza e Prokurorisë për Bashën, Ristanin dhe Dervishin është e përqendruar tek falsifikimi i formularëve lidhur me shumën e financuar prej 675 mijë dollarësh në favor të lobimit të PD-së në SHBA. Një nga pikat të cilat anashkaloi gjykata e Tiranës ishte edhe mosmarrja e dëshmisë së lobisitit amerikan Nick Muzin, i cili është edhe njeriu që ka nënshkruar kontratat e lobimit me kreun e Partisë Demokratike Lulzim Basha. Tashmë pritet se cili do të jetë gjykimi i gjykatës së apelit, nëse do të lëjë në fuqi vendimin e gjykatës së shkallës së parë apo do ta rikthejë atë për të rigjykim në themel, duke qenë se sipas prokurorisë duhet thirrur për të dëshmuar edhe lobisti amerikan i Lulzim Bashës, Nick Muzin.
