Ndonëse opozita parlamentare ka vendosur ndryshimin e sistemit zgjedhor si kusht të pjesëmarrjes së saj në tryezën e Këshillit Politik, duket se gjasat janë të vogla që ky propozim të merret parasysh nga “të mëdhenjtë”.
Në dokumentin e punës të miratuar sot në Këshill, dhe të shpërndarë nga Partia Demokratike, janë përcaktuar temat dhe datat respektive kur ato do të diskutohen.
Ajo që bie në sy është se propozimet për ndryshimin e sistemit zgjedhor janë lënë që të bëhen më 10 mars, vetëm 5 ditë larg nga afati kur është parashikuar për t’u përmbyllur drafti përfundimtar i reformës zgjedhore.
Partia Socialiste, Partia Demokratike dhe Lëvizja Socialiste për Integrim janë duke iu shmangur vazhdimisht diskutimeve për ndryshimin e sistemin zgjedhor. Mazhoranca thotë se është e hapur për çdo diskutim, por pa treguar qëndrimin e saj mbi këtë çështje, ndërsa opozita jashtë-parlamentare akuzon mbështetësit e kësaj ideje se “po bëjnë lojën e Edi Ramës”.
Ndryshimi i sistemit zgjedhor është kërkuar edhe nga disa organizata, përfshirë Nisma Thurje, e cila depozitoi në Kuvend një kërkesë me 50 mijë firma.
Sa i përket kalendarit të diskutimeve në Këshillin Politik, një periudhë e shkurtër i është lënë edhe propozimeve që do të bëhen për votimet jashtë vendi. Data 1 mars është parashikuar për të bërë propozimet në Këshill.
Duket se Këshilli Politik do i shmanget edhe dy çështjeve të tjera të rëndësishme siç është ligji i referendumeve dhe ligji për financimin e partive politike. Në planin e punës thuhet këto dy çështje “mund te prekin Kushtetutën dhe kërkojnë një debat me të gjerë apo rrugë miratimi tjetër”. Çështja e referendumit nuk është përfshirë fare në kalendar./Fjala.al
