Mjeku Arjan Harxhi thotë se virusi që tashmë po shqetëson botën, është një virus i zbuluar qysh në vitet ’60.
Në studion e emisionit “Arena” ai tha se ky është një nëntip i ri, i cili është bujtës te kafshët dhe ndryshon tipare duke u shfaqur te njeriut.
Harxhi përmendi ndryshimin që ka bërë ky virus në vitin 2002 dhe në vitin 2012. Sipas tij ekziston panik pasi është një nëntip i ri virusi me tipare të reja.
“Është një virus që njihet nga bota mjekësore, është një virus që është zbuluar në vitin ‘60. Është një virus që shkakton sëmundje të zakonshme, ftohjen. Veçoria e viruseve, që ne i trembemi, është ndryshueshmëria e tyre.
Sidomos kur bëhet fjalë për viruse që kanë bujtës kafshët, kur këto kalojnë, për një arsye të caktuar, ndryshojnë tiparet, kalojnë te njeriu, ndryshojnë këto tipare për tu bërë patogjen te njeriu. Ka ndodhur ky ndryshim, ne nuk e dimë pse. Ka ndodhur një herë në 2002 dhe u shfaq SARS-i i famshëm.
Në 2012 ndryshoi dhe u shfaq MERS-i, nga një bujtës tjetër, ishte një nëntip tjetër i koronavirusit dhe dha këtë infeksion të rëndë të mushkërive në Lindjen e Mesme.
Ndoshta tani i erdhi radha të bënte atë kapërcimin e tretë për të shfaqur këtë virus të ri. Prandaj ka panik se quhet virus i ri, pra është një virus me tipare të reja. Sa herë që ka viruse të reja që prekin njerëzimin, ky i fundit duhet të shqetësohet”, tha Arjan Harxhi.
