Ish-shefi i Antidrogës për qytetin e Vlorës, Dritan Zagani është rrëfyer për mediat italiane teksa tregon arsyet se përse nuk mundi të hetonte dot bandën e drogës, ku rezultoi i përfshirë edhe ish-ministri i Brendshëm, Saimir Tahiri.
Dritan Zagani i cili ka përfituar azil politik në Zvicër për shkak se përndiqej nga shteti shqiptar, tregon se si ra në gjurmët e bandës së Habilajve në qytetin e Vlorës.
Ai thotë për televizionin TG3 se pas investigimit pa që pronari i trafikimit të drogës ishte vetë ish-ministri i Brendshëm Saimir Tahiri. Ai tregon historinë e tij, se si zbuloi që makina e ministrit të Brendshëm përdorej nga eksponentë të mafies.
Zagani thotë se ai nuk mundi të bëjë asgjë kundër bandës së drogës, pasi ishte kjo e fundit që e çoi atë pas hekurave. Ndërsa shton se ai kërkon që drejtësia të vihet në vend, veçanërisht në rastin e tij kur është ndaluar dhe kërkohet me pa të drejtë.
Ndërkohë që ish-ministri i Brendshëm Saimir Tahiri u dënua me 2 vite e gjysmë punë të detyruar, Zagani kërkohet ende nga policia shqiptare.
Ajo e ka futur atë në listën e kuqe të të shumëkërkuarve. Por kjo një është tentativë e kotë sepse Dritan Zagani nuk ekziston në listat e Interpolit. Ndërsa në Zvicër kanë kërkuar azil politik edhe oficerë të tjerë të antikrimit që vijnë nga Shqipëria./Fjala.al/
