Në Itali janë konfirmuar mbrëmjen e sotme dy rastet e para të personave të infektuar me koronavirus.
Bëhet fjalë për dy turistë kinezë të cilët, sipas kryeministrit Conte, po mbahen në spitalin Spallanzani në Romë.
“Kemi dy raste të konfirmuara për herë të parë të koronavirusit në Itali. Ata janë dy turistë kinezë dhe kanë në vendin tonë për disa ditë. Nesër në mëngjes kam thirrur një mbledhje të Këshillit të Ministrave ku do të marrim masa të mëtejshme në mënyrë që të vihen në dispozicion të gjitha strukturat kompetente, përfshirë mbrojtjen civile”, deklaroi Giuseppe Conte në një konferencë shtypi.
Në situatë alarmi ndodhen edhe autoritetet greke pasi në spitalin AXEPA të Selanikut është shtruar një pacient që dyshohet se është infektuar me koronavirus. Gjithsesi, analizat përfundimtare nuk kanë dalë ende.
Ndërkohë që në vendet fqinje po konfirmohen rastet e para, autoritetet në Shqipëri kanë garantuar se janë marrë të gjitha masat e nevojshme për tu përballur me hyrjen e mundshme të koronavirusit edhe në vendin tonë.
