175 të dënuar, shumica e të cilëve janë gra, do të lënë qelitë pas votimit në Kuvend të ligjit për amnistinë.
Në këtë mënyrë është miratuar me 102 vota pro projektligji “Për dhënie amnistie”.
Kryetari i Komisionit të Ligjeve Ulsi Manja deklaroi nga foltorja e Kuvendit se numri i të dënuarve që do të përfitojnë nga amnistia është 175, por deputeti opozitar Murrizi e cilësoi të vogël në krahasim me propagandën që sipas tij është bërë në gjashtë muajt e fundit.
Ndërkohë Manja tha se parlamenti mund të propozojë një tjetër amnisti.
Edhe deputeti Kujtim Gjuzi kërkoi zgjerimin e kategorive të amnistisë. Ai tha se 175 të dënuar që i kap amnistia për t’u liruar janë pak.
“Amnistia është e mangët, selektive, duhet riparë. Çdo gjashtë muaj të bëjmë amnisti?! Le ta shtyjmë me një javë dhe të zgjerojmë gamën. Ata që janë vuajtur 2/3 e dënimit të shkojnë pranë familjeve duke i mbajtur në monitorim” tha Gjuzi.
Ndërsa deputeti Lefter Maliqi e ka quajtur të cunguar amnistinë për të burgosurit. Ai tha se po lirohen trafikantët dhe po lihen në burg ata që janë kapur me 5 gramë drogë.
