Kosova do të ketë të hënën, 3 shkurt, qeverinë e re. Lëvizja Vetëvendosje dhe Lidhja Demokratike kanë arritur sot marrëveshjen për formimin e koalicionit qeverisës.
Mediat kosovare raportojnë se nesër do të firmoset marrëveshja e bashkëqeverisjes dhe të hënën do të votohet në Kuvend përbërja e qeverisë së re.
Glauk Konjufca i VV-së do të dorëhiqet nga posti i kreut të Kuvendit, çka kishte sjell edhe ngërçin midis dy partive, dhe pritet të marrë postin e ministrit të Jashtëm. Në vend të tij, në krye të Kuvendit pritet të emërohet Vjosa Osmani e LDK-së.
Negociatat midis Albin Kurtit dhe Isa Mustafës vijuan prej 118 ditësh, duke bërë të mundur që marrëveshja të arrihet vetëm sot, pasi Vetëvendosje është tërhequr nga posti i kryeparlamentarit.
