Ka mbërritur në Ankara avioni ushtarak që transportoi 42 persona, përfshirë edhe shtetasen shqiptare, Silvana Doçi, të evakuuar nga qyteti Wuhan i Kinës për shkak të koronavirusit të ri.
Studentja shqiptare, së bashku me personat e tjerë, janë dërguar në spitalin Dr. Zekai Tahir Burak në Ankara me 17 ambulanca, ku do të mbahet nën vëzhgim për 14 ditë në dhoma teke dhe do t’i nënshtrohet kontrolleve çdo tre ditë.
Ushqimet dhe të gjitha shërbimet do të ofrohen me produkte njëpërdorimëshe të cilat pas përdorimit do të vendosen në qese të veçanta dhe do të vlerësohen si mbetje mjekësore.
Avioni dhe materialet në avion do t‘i nënshtrohen procesit të pastrimit nga ekspertë kimikë, biologë, radiologë dhe bërthamorë (KBRN) të Komandës së Forcave Ajrore. Procesi i pastrimit nag brenda dhe jashtë avionit do të kryhet me përdorimin e kimikateve dhe pajisjeve të veçanta nga personeli i pajisur me maska gazi dhe veshje të KBRN-së. Më pas në çadrën e dekontaminimit të KBRN-së do të bëhet procesi i pastrimit të një e nga një të personelit të avionit, raporton ‘Anadolu Agency’.
Në kuadër të operacionit të evakuimit të planifikuar nga Ministria turke e Shëndetësisë, avioni ushtarak A400M i Forcave Ajrore Turke, përfshirë 2 ekspertë për infeksione, 4 infermierë për kontrollin e infeksioneve u nis dje në orën 12:05 sipas kohës lokale drejt qytetit Ëuan të Kinës. Në avion u transportuan gjithashtu edhe ndihma me pajisje mjekësore për Kinën.
Avioni ushtarak tansportues i shndërruar në ambulancë mbërriti në orët e natës në qytetin Wuhan. Pas kontrolleve të kryera nga ekipet e ekspertëve shëndetësorë udhëtarët hipën në avion i cili në orët e para të mëngjesi u nis nga Kina drejt Turqisë.
