Një servis makinash në rrugën Durrës-Shijak është përfshirë në një zjarr i fuqishëm. Ngjarja ka ndodhur në vendin e njohur si “Mulliri i Bullgarit”, ku flakët kanë shkrumbuar një numër të madh automjetesh.
5 zjarrfikëse të Durrësit mbërritën në vendngjarje, por në vështirësi për të shuar flakët kërkuan ndihmë nga Tirana.
Aty u dëgjuan edhe shpërthime të shpeshta, çka mendohet të ishin makinat që digjeshin.
Policia bën me dije se është bërë i mundur izolimi i përhapjes së mëtejshme të flakëve.
“Forcat e Ndërhyrjes së Shpejtë të Tiranës, shërbimet e Drejtorisë Vendore të Policisë dhe të Komisariatit të Policisë Durrës po evakuojnë banorët përreth, duke i larguar nga jashtë perimetrit të sigurisë . Shërbimet e Policisë rrugore të Durrësit kanë marrë masa për devijimin e qarkullimit dhe mos lejimin e kalimit të asnjë automjeti në afërsi të servisit të përfshirë nga flakët. Në vendngjarje ndodhet dhe grupi hetimor, ku vijon puna për zbardhjen e rrethanave të rënies së zjarrit në këtë servis. Vijon puna për shuarjen e plotë të zjarrit”, thuhet në njoftimin policisë.
Ende nuk ndihet se çfarë e ka shkaktuar zjarrin.
