Deklarata e David Sassolit, kreu i Parlamentit Evropian, se në Shqipëri gjeti një bashkim të njerëzve rreth projektit të integrimit evropian, ka tërhequr vëmendjen e akademikut Artan Fuga. Fuga shkruan se nuk e di se si ka arritur Sassoli në këtë përfundim në një kohë kur realiteti i shoqërisë shqiptare është larguar gjithnjë e më shumë nga integrimi evropian.
Sipas Fugës, në Shqipëri veprojnë faktorë të fuqishëm që nuk kanë asnjë interes që Shqipëria të integrohet në BE.
“Hapen ose nuk hapen negociatat, kjo nuk ka lidhje fare me atë që fatkeqësisht është sot pozicioni i lobeve të fuqishme shqiptare kundër BE. Unë uroj sinqerisht që zoti David Sassoli t’a ketë të bazuar çka deklaroi, të mos e kenë gënjyer, ose më keq, të jetë vetëgënjyer”,shkruan akademiku.
Reagimi i plotë
I nderuar Shkëlqesia Juaj zoti David Sassoli:
Shqipëria europiane ka pësuar knockdoën
—————————————————-
Unë nuk e di sesi arriti zoti David Sassoli, kryetar i Parlamentit Europian, te përfundimi se në Shqipëri gjeti një bashkim të njerëzve rreth projektit të integrimit europian.
Ashtu qoftë!
Nuk e di se ku u mbështet, ku i mori faktet, ku i bëri matjet e opinionit, ku i studjoi prirjet e ekonomisë, të kulturës, të administrimit.
Punë e tij!
Uroj të mos ketë gabuar! Do të m’a donte zemra!
Sa për mua, unë i qendroj bindjes që vjen nga studimet e mia se :
- Realiteti i shoqërisë shqiptare i është larguar gjithnjë e më shumë integrimit europian, jo vetëm në politikë, por, edhe në art, kulturë, shkencë, ekonomi.
- Shqiptarët emigrojnë në Evropë sepse ndjejnë se modeli europian është në zbehje dhe në pikjatë në Shqipëri.
- Në Shqipëri veprojnë faktorë të fuqishëm që nuk kanë asnjë interes që Shqipëria të integrohet në BE. Si asnjëherë më parë Shqipëria është e përçarë mes qytetarëve që vazhdojnë ende të duan një afrim me BE, dhe lobive të fuqishme antievropiane në veprime, por hipokrizisht europianiste.
- Modeli i zgjedhjeve, i gjykatave, i drejtësisë, i ekonomisë, i të drejtave të njeriut nuk ka asnjë avancim, përkundrazi është në lëvizje të kundërt me modelet europiane.
- Shqipëria europiane, Shqipëria e rrënjëve, e traditës, ka qenë pjesë e Europës në besimet, organizimet sociale, vlerat njerëzore, kurse sot kulturalisht dhe ekonomikisht, politikisht është e izoluar nga Evropa. Njësoj, në disa drejtime të rëndësishme, si në kohën e Perdes të Hekurt!
Hapen ose nuk hapen negociatat, kjo nuk ka lidhje fare me atë që fatkeqësisht është sot pozicioni i lobeve të fuqishme shqiptare kundër BE.
Unë uroj sinqerisht që zoti David Sassoli t’a ketë të bazuar çka deklaroi, të mos e kenë gënjyer, ose më keq, të jetë vetëgënjyer!
Forcimi i europianizmit në Shqipëri kërkon përqasje të tjera sa nuk është shumë vonë!
