Rusia ka vendosur të zgjedhë një rrugë të shkurtër me personat e infektuar nga koronavirusi vdekjeprurës. Çdo person i huaj që hyn në vend dhe rezulton me virus do të dëbohet.
Është kryeministri Mikhail Mishustin që konfirmon se koronavirusi është futur në listën e sëmundjeve që janë shumë infektive, çka mundëson masa më të rrepta ndaj shtetasve të huaj me shenja sëmundjeje, përfshirë karantinën dhe dëbimin.
“Tani koronavirusi i ri është shtuar në listën e sëmundjeve shumë infektive. Kjo do të mundësojë dëbimin e shtetasve të huaj, nëse vërtetohet se kanë këtë sëmundje dhe shpalljen e masave të veçanta kufizuese, duke përfshirë izolimin dhe karantinën”, u shpreh Mishustin.
Rusia ka mbyllur kufijtë me Kinën, ka pezulluar qarkullimin në kufirin me Mongolinë, si dhe ka ndaluar përkohësisht dhënien e vizave për grupet turistike dhe vizat e punës për qytetarët kinezë.
Koronavirusi ka shkaktuar deri më tani vdekjen e të paktën 361 personave në Kinë, ndërsa mbi 17.200 të tjerë janë infektuar.
