Sipas bazës së të dhënave të Ministrisë së Brendshme ruse, policia ruse ka vendosur në listën e të kërkuarve kryeministren estoneze Kaja Kallas, ministren e Kulturës së Lituanisë dhe anëtarët e parlamentit të mëparshëm letonez.
Zëdhënësi i Kremlinit, Dmitry Peskov, tha se Kallas kërkohej për “njollosjen e kujtesës historike”.
Agjencia shtetërore ruse TASS tha se zyrtarët baltik u akuzuan për “shkatërrimin e monumenteve të ushtarëve sovjetikë”, akte që dënohen me 5-vjet burgim sipas kodit penal rus.
“Kremlini tani shpreson se kjo lëvizje do të ndihmojë për të heshtur mua dhe të tjerët – por nuk do të ndodhë”, tha Kallas në një postim në platformën e mediave sociale X.
“Unë do të vazhdoj mbështetjen time të fortë për Ukrainën. Do të vazhdoj të qëndroj për rritjen e mbrojtjes së Evropës,” tha ajo, duke shtuar se masa e Rusisë nuk ishte një surprizë.
Estonia, Letonia dhe Lituania janë të gjitha anëtare të Bashkimit Evropian dhe NATO-s dhe marrëdhëniet e tyre me Moskën janë përkeqësuar ndjeshëm që nga fillimi i luftës në Ukrainë gati dy vjet më parë, shkruan Reuters./O.S
