S`kishte si të ndodhte ndryshe. Muaji i parë i vitit nuk mund të ishte vetëm kriminal për vendin tonë, për sa iu përket vrasjeve , atentateve dhe krimeve në familje. Një shifër e frikshme përgjakjesh janë shënuar edhe nëpër rrugët e vendit.Muaji i parë i vitit mbyllet me një bilanc tragjik sa i përket aksidenteve rrugore në Shqipëri. Sipas Qendrës Kombëtare të Urgjencës Mjekësore përgjatë janarit në vendin tonë janë regjistruar 506 aksidente rrugore.
112 prej tyre janë konsideruar me rrezikshmëri të lartë për jetën ndërkohë që 16 persona të përfshirë në to kanë gjetur vdekjen. Qarku me numrin me të lartë të aksidenteve rrugore është Tirana ndiqet nga Vlora, Durrësi dhe Elbasani. I fundit në listë qëndron Kukësi me asnjë aksident të regjistruar përgjatë muajit janar dhe Dibra me vetëm një. Mos respektimi i rregullave të qarkullimit rrugor, drejtimi i mjetit tej normave të lejuara dhe përdorimi i telefonave gjatë drejtimit të automjetit janë shkaqet kryesore sipas Qendrës Kombëtare të Urgjencës Mjekësore që i kanë ndërprerë në mes jetën e shumë qytetarëve.
Nisur nga kjo dhe numri në rritje edhe i aksidenteve me pasojë vdekjen apo edhe atyre me rrezikshmëri të lartë për jetën, Qendra Kombëtare Urgjencës Mjekësore, apelon për kujdes të shtuar gjatë drejtimit të automjeteve ndërsa thotë: “Është më mirë të arrini gjysmë ore me vonesë, sesa mos të mbërrini në destinacion!” n.k/Fjala.al/
