Janari njihet si muaji kur shumica vendosin të lënë pas gjithë veset e këqija dhe t’ia nisin nga e para. Mes gjërave që lihen në të shkuarën, siç flasin disa studime, hyn edhe martesa, sepse në muajin janar, sipas studiove ligjore të avokatisë ka një rritje të numrit të kërkesave për divroc.
Artikujt bazuar në studime nga viti 2016 e mbrapa, i kanë vendosur në mënyrë jo zyrtare muajit janar titullin: “Muaji i divorceve”.
Nga Dita e Falenderimeve dhe deri në fund të vitit, zyrat e avokatisë kanë ritëm shumë të ngadaltë, sepse njerëzit i lënë divorcet pezull për pas pushimeve ka thënë për NY Times, Vicky Townsend, drejtuese ekzekutive e Aleancës Nacionale të Profesionistëve të Divorceve.
“Njerëzit ndjekin parimin: Vit i ri, fillime të reja”, shpjegon më tej ajo. Thënë me shifra, në SHBA, sipas një pjese të mirë të studiove ligjore numri i divorceve brenda janarit është 25-30% më i lartë.
Interesant është fakti që edhe Google e mbështet deri diku këtë arsyetim, pasi sipas analizës që i është bërë kërkimeve për divorc në këtë periudhë, prej datës 6 janar deri në 12, ka një rritje të ndjeshme në krahasim me muajt e tjerë.
Fjala “divorc” kërkohet shumë edhe në fund të dhjetorit, ndërsa për vitet 2016 dhe 2018, muajt që kishin më shumë kërkime për divorc ishin përkatësisht marsi dhe shtatori. Megjithatë, tendenca vazhdon të favorizojë janarin edhe aktualisht.
“Trendi i divorceve” në janar thuhet se ka nisur në vitet 1970-1980. Por, jo çdo avokat dhe studio ligjore bie dakord me këtë konkluzion.
David K. Wilkinson, partner i “Wilkinson and Finkbeiner Law Firm” në San Diego shprehet se nuk është aq e pazakontë rritja e divorceve në janar, por e vetmja arsye pse bie në sy çdo ndryshim në shifra është fakti se nëntori dhe dhjetori janë muaj shumë të ngadaltë në këtë drejtim.
Ndërsa një studim i hershëm, realizuar nga Universiteti i Washington, në vitin 2016, analizoi të dhënat nga viti 2001 deri në 2015-ën duke nxjerrë si muajt e pikut të divorceve marsin dhe gushtin.
Tema ka ende diskutime të hapura, sepse nuk ka një studim të qartë aktualisht që tregon ritmin e shifrave pas vitit 2018. Por nga konstatimet e viteve të fundit, sidomos pas pandemisë Covid-19, numri i divorceve ka arritur majat dhe ka rënë me ritme shumë të ngadalta prej asaj kohe./E.Ç
