Ka mbaruar mbledhja me dyer të mbyllura e klubit të Barcelonës dhe duket se të gjitha palët kanë dalë të kënaqura.
Pas replikave të yllit të skuadrës, Lionel Messit me drejtorin sportiv të Barçës, Eric Abidal mediet kudo në botë filluan të raportonin për shkarkim nga detyra të këtij të fundit, ose një largim të mundshëm të argjentinasit.
Mësohet se mbledhjen e zhvilluar sot presidenti i Barcelonës, Josep Maria Bartomeu ka kërkuar që Messi dhe Abidal të pajtohen me njëri-tjetrin. Madje mësohet se nuk do të merret asnjë masë që ka të bëjë me pezullim apo shkarkim të asnjërit prej tyre.
Kujtojmë se në një intervistë ditën e djeshme francezi kishte thënë se shkarkimi i Ernesto Valverdes ka qenë i detyruar nga lojtarët, ndërsa kapiteni i skuadrës i ka kërkuar përmes një postimi në rrjetet sociale që të mos flasë për të gjithë,por të japë emra konkretë./Fjala.al/
