Vladimir Gjuta, i akuzuar si autori i vendosjes së tritolit tek farmacia e babait të ish-ministrit të Brendshëm, Saimir Tahiri, ia ka hedhur sërish drejtësisë. Vetëm pak ditë pasi u arrestua nga uniformat blu për shkak se goditi me çekiç kushëririn e tij, Gjuta është liruar sot nga paraburgimi.
Gjuta e ka rrahur paq kushëririn pasi viktimës i janë thyer disa dhëmbë dhe ka dëmtuar njërin sy. I dhunuari e denoncoi Gjutën në Polici, pas goditjes që mori prej tij me çekiç. Ndërsa shkaqet vijojnë të mbeten mister. Por, më pas i dhunuari është tërhequr nga denoncimi dhe Gjuta është lënë sot i lirë.
Vladimir Gjuta është një person shumë i njohur për drejtësinë, teksa ai ishte njeriu që i vendosi tritol farmacisë së babait të Saimir Tahirit, në vitin 2015, kohë kur vetë Tahiri ishte ministër i Brendshëm.
Në atë periudhë ai tentoi të largohej drejt Kosovës i maskuar me një paruke në kokë, por pas një kontrolli nga ana e Policisë në makinën e tij, ai ra në pranga. Për këtë ngjarje u arrestua dhe Ernest Gjuta dhe Baftjar Bruka.
Megjithatë, ai do të lirohej në vitin 2016, dhe pas lirimit ai u arrestua sërish pasi akuzohej për dhunë fizike ndaj babait të tij.
E njëjta histori ndodh edhe sot teksa Gjuta ia ka hedhur përsëri drejtësisë duke dalë nga paraburgimi edhe pse rrahu me çekiç kushëririn e tij./Fjala.al/
