Lionel Messi shpërtheu të martën pas komenteve të Eric Abidal në lidhje me lojtarët e Barcelonës. Sekretari teknik i Barçës pretendoi se lojtarët nuk kishin punuar aq shumë sa duhet dhe Messi, i cili po ushqehet me situata të tilla në klub, përdori rrjetet sociale për të goditur Abidal.
Kapiteni i Barcelonës është i vetëdijshëm se ai po akuzohet se ishte i përfshirë në shkarkimin e Ernesto Valverde, edhe pse ai qëndroi pranë ish-trajnerit të tij deri në minutën e fundit. Ai është i lodhur nga fajësimi për gjoja se ka ndikuar në nënshkrime dhe emërime stërvitore, pasi në realitet ai nuk ka fuqinë për të diktuar politikën e klubit.
Disa muaj më parë, Gerard Pique gjithashtu kritikoi bordin për përdorimin e medieve gjë e cila sipas tij kishte lënë të kuptohet se dhoma e zhveshjes është në krye të klubit.
Në fillim të sezonit, Messi theksoi qëllimin e tij për të dalë në pension te Barcelona, por ai gjithashtu tha se dëshiron të jetë pjesë e një projekti fitues. Ai insistoi që ardhja e Neymar mund të ndihmonte ekipin të arrinte objektivat e tyre, por në vend të kësaj vetëm Antoine Griezmann u bashkua me klubin katalunas për të rritur sulmin raporton “Marca”.
Ishte fat i keq që Luis Suarez dhe Ousmane Dembele kanë pësuar lëndime në fundvit, por Messi gjithashtu do të irritohet që nuk u bë asnjë nënshkrim në janar edhe pse u larguan disa lojtarë.
Shprehjet e fytyrës dhe qëndrimi i tij portretizojnë zhgënjimin e tij nga muajt e fundit. Kjo është arsyeja pse ai reagoi ndaj komenteve të Abidal, arsyeja e fundit që numri 10 duhet të ndjehet i ngopur në Camp Nou.
Lumturia e Messit është me një rëndësi parësore për Barcelonën pasi ai mund të vendosë t’i thotë lamtumirë gjatë verës. Ai dëshiron të qëndrojë, por jo me çdo kusht dhe ka gjithnjë e më shumë arsye që ai të ndjehet sikur përplas derën e mbyllur pas tij./Fjala.al/Katerina Tafa/
