Një numër i madh pyetjesh iu drejtuan kryeopozitarit Lulzim Basha nga qytetarët, teksa ai qëndroi për një orë në komunikim të drejtëpërdrejtë në “Facebook”. Pyetja kryesore dhe që përsëritej vazhdimisht ishte për zgjedhjet e parakohshme, të cilës Basha iu përgjigj (Uroj për zgjedhje të parakohshme), por kishte edhe nga ato pyetje me rëndësi, të cilat edhe pse “e mbytën” profilin e kryedemokratit, ky i fundit zgjodhi të mos u përgjigjej.
Një prej tyre ishte nëse Basha ishte ose jo për ndryshim të sistemit zgjedhor, në një kohë që po zhvillohen diskutimet për reformën zgjedhore. Por pavarësisht interesimit, kreu i PD-së nuk mori përsipër të përgjigjej. Pyetja e shumë qytetarëve mbeti pa përgjigje.
Një tjetër temë me interes dhe për të cilën u bënë shumë komente ishte edhe votimi i emigrantëve. Me dhjetëra emigrantë shqiptarë e pyetën kreun e opozitës nëse do të bëhej i mundur që ata të votonin në zgjedhjet e ardhshme, por as kjo pyetje “nuk ra në syrin” e Bashës.
Edhe qëndrimi që PD do të mbajë kur të vijë në pushtet për taksën në Rrugën e Kombit, nuk u bë i ditur nga Lulzim Basha.
Sigurisht që pyetjet ishin nga më të ndryshimet si programi i PD-së për biznesin e vogël, niveli i dobët i sistemit të shëndetësisë, përballja me koncesionet korruptive, etj, për të cilat Basha gjeti kohën që të përgjigjej dhe të sqaronte qytetarët.
