Ditën e sotme SHÇBA ka pezulluar 4 punonjës policie pasi dyshohet se kanë tentuar të kalojnë në mënyrë të paligjshme një shtetase në Rinas. Policët akuzohen për veprën penale “Dhënie ndihme për kalim të paligjshëm të kufirit” dhe shtetësja po ndiqet në gjendje të lirë.
Njoftimi i SHÇBA:
Dyshohet se tentuan të kalojnë në mënyrë të paligjshme një shtetase në Rinas, SHÇBA pezullon nga detyra 4 punonjës policie për veprën penale “Dhënie ndihme për kalim të paligjshëm të kufirit”, si dhe po ndiqet në gjendje të lirë shtetasja.
Pas një hetimi pro-aktiv të Shërbimit për Çështjet e Brendshme dhe Ankesat (SHÇBA), Tiranë, në bashkëpunim me Prokurorinë pranë Gjykatës së Shkallës së Parë, në kuadër të një procedimi penal për veprën penale “Dhënie ndihme për kalim të paligjshëm të kufirit”, me vendim të Gjykatës janë caktuar masat e pezullimit të ushtrimit të detyrës për punonjësit e Policisë:
– L.S., me detyrë në DPPSH;
– M.B., me detyrë në DPPSH;
– A.M., në Komisariatin e Policisë Rinas;
– A.D., në Komisariatin e Policisë Rinas.
U vendos masa “Detyrim për t’u paraqitur në Policinë Gjyqësore”, për shtetasen K.B.
Hetimet po vijojnë nën drejtimin e Prokurorisë së Shkallës së Parë, Tiranë.
Çdo shtetas që rastis në shkelje të punonjësve të Policisë, SHÇBA I fton të raportojnë në numrin falas 0800 90 90.
