Pas krijimit të qeverisë së re të Kosovës, pritet edhe procesi i rifillimit të dialogut me Serbinë. Për rinisjen e bisedimeve, është angazhuar edhe vetë Angela Merkel, e cila ka sugjeruar të dërguarin special të Bashkimit Evropian në këto bisedimeve. Ai do të jetë ministri i Jashtëm sllovak, Mirosllav Lajçak.
Siç raportojnë mediat serbe, ai vjen në këtë post me sugjerimin e kancelares gjermane, Angela Merkel, e cila kështu do të angazhohej indirekt në mënyrë më të fortë.
“Tani është zyrtare, si udhëheqja shtetërore e Beogradit, ashtu edhe udhëheqja e Prishtinës janë të vetëdijshëm që Lajçak do të udhëheqë negociatat në të ardhmen”, ka thënë burimi në fjalë.
Megjithatë, mediat serbe shkruajnë se kabineti i presidentit Aleksandar Vuçiç nuk është shprehur për këtë çështje. Ajo që e rrit edhe më shumë besueshmërinë e zgjedhjes së Lajçak është fakti se Mirosllav Lajçak, është ministër në largim. Lajçak është përzgjedhja e Berlinit. Po ashtu edhe Rusia nuk do të ketë asgjë kundër, pasi sllovaku ka mbaruar Institutin Shtetëror të Moskës për Marrëdhënie Ndërkombëtare.
Lajçak është njohës i mirë i rrethanave në rajon dhe një politikan me përvojë, dhe tashmë ka mbajtur disa pozicione të rëndësishme në rajon. Ai ka shërbyer si Përfaqësues Special i BE-së në Bosnje dhe Hercegovinë nga 2006 deri në vitin 2009 dhe ka punuar shkurtimisht në Shërbimin Evropian të Veprimit të Jashtëm./Fjala.al/
