Operacioni “Forca e Ligjit” thuhet se ka sekuestruar fuoristradën e blinduar tip ‘Jeep’ të Dashamir Gjokës. Burime nga policia mohojnë këtë fakt por janë burime të tjera që thonë se automjeti i blinduar ndodhet tashmë në drejtorinë e Policisë së Durrësit. Në zbatim të aktit normativ Anti-KÇK ky vendim sekuestroje është marrë si masë emergjente me urdhër të drejtorit të Përgjithshëm të Policisë së Shtetit, pas kërkesës së OFL-së.
Më herët, më 5 shkurt, Operacioni “Forca e Ligjit”, në vijim të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, i kishte dërguar kërkesën me shkrim për vetëdeklarimin e burimeve të pasurisë, Dashamir Gjokës. Për sekuestrimin e ambienteve të tij tregtare, dhe bizneseve që ai zotëron do të duhet vendimi i Gjykatës, pas verifikimeve të dosjes që OFL dorëzon në Prokurorinë e Posaçme Kundër Krimit të Organizuar dhe Korrupsionit, SPAK.
Biznesmeni i njohur, i ka shpëtuar ligjit anti-mafia dhe mundi të rimarrë pas pasuritë e konfiskuara nga Gjykata për Krime të Rënda në vitin 2017. “Fjala” kontaktoi Policinë e Shtetit në lidhje me këtë çështje por u mohua zyrtarisht. Janë burime të tjera që tregojnë se Dashamir Gjoka gjendet në Drejtorinë e Policisë së Durrësit që para tri orësh, si duket për të rimarrë mjetin e tij që ia ka bllokuar policia. n.k/Fjala.al/
