Një 36-vjeçar ka humbur jetën në një nga burgjet franceze. Lajmin e ka konfirmuar vetë familja e të riut Mentor Rexha.
Familja ka hapur dyert e mortit në Shkodër edhe pse nuk e kanë ende trupin e djalit. Nga ana e saj, nëna e të riut, Rukie Rexha i ka bërë thirrje shtetit shqiptar që të zbardhë ngjarjen pasi ajo është e sigurt që i biri nuk ka kryer vetëvrasje, por është dhunuar në burg.
“Lajmin e kemi marrë nga shokët e tij që na kanë treguar sepse askush tjetër nuk na ka lajmëruar për vdekjen e djalit. Djali kishte një vit që ishte në Francë dhe 6 muaj kishte në burg se akuzohej për djegien e disa makinave. Ka qenë duke folur me vëllain në telefon kur e kanë arrestuar. Gjatë kohës që kemi folur në telefon nuk na ka shprehur shqetësime dhe ne jemi të bindur së nuk ka kryer vetëvrasje. Kërkojmë që të hetohet sepse në trup ka shenja dhune. I bëj thirrje shtetit të më kthejnë trupin e djalit dhe të zbardhet ngjarja. Fëmijët i kam rritur me halle”, shprehet nëna e 36-vjeçarit, për Panoramën.
Ndërkaq, nga ana tjetër , djali i xhaxhait, Selaudin Rexha thekson se “Ambasada shqiptare në Francë nuk na është përgjigjur por na është shprehur në mënyrë absurde kur i kemi kërkuar ndihmë dhe të gjitha veprimet janë dukë i kryer vëllai i viktimës më të motrën e tij. Akuzat ndaj kushëririt tim janë të pavërteta. Ky është rasti i 5 i shqiptarëve që vriten në burg dhe dy janë nga Shkodra dhe shteti hesht ndërkohë që po të ishin nga ndonjë shtet tjetër reagimi do ishte i madh”
