Policia shqiptare vijon operacionet e riatdhesimit të shtetasve shqiptarë, të cilët kanë kërkuar azil në vendet e BE-së. Gjatë mesditës së sotme janë riatdhesuar vullnetarisht 40 shtetas shqiptarë, 34 nga Franca dhe 6 nga Belgjika.
Shqipëria është një vend i sigurt dhe shanset për të marrë azil janë zero për shqiptarët.
Prej 1 janarit 2020 e deri sot janë riatdhesuar 808 shtetas shqiptarë, të kthyer deportiv dhe të riatdhesuar nëpërmjet fluturimeve me charter, në bashkëpunim me Frontex-in, të cilët kanë pasur si qëllim kërkimin e azilit në vendet e BE-së.
Ministria e Brendshme dhe Policia e Shtetit apelojnë edhe një herë për të gjithë ata shtetas që udhëtojnë në hapësirën Schengen që të mos bëjnë asnjë përpjekje për të aplikuar për azil në Francë apo në çdo shtet tjetër të BE-së dhe të mos bëjnë asnjë shpenzim duke paguar ata që duan të përfitojnë duke i mashtruar se do t’u sigurojnë azil, pasi rezultati në të dyja rastet do të jetë negativ. /Fjala.al
