Delegacioni i Komisionit të Venecias ka nisur takimet në ditën e dytë që ndodhen në Shqipëri, ku u takuan me aktorët politikë dhe jo vetëm, për ligjin e mediave audio-vizive. Paraditen e sotme delegacioni i “Venecias” ka zhvilluar një takim me Presidentin Ilir Meta, ku janë njohur me qëndrimin e tij.
Ka qenë zyra e medias në Presidencë që ka zbardhur takimin, ku shkruhet se Meta ka thënë që paketa lë Shqipërinë pas në procesin e integrimit në Bashkimin Evropian dhe kthehet censura në media.
Në orën 17:40, një delegacion i opozitës, me Albana Vokshin, Genc Pollon dhe Edmond Haxhinaston zhvilluan një takim me delegacionin e Venecias për çështjen e paketës anti-shpifje.
Ky takim u zhvillua tek zyrat e Këshillit të Europës në Tiranë.
Përfaqësuesja e opozitës Albana Vokshi deklaroi se Edi Rama miraton ligje antikushtetuese dhe antieuropiane, sepse do që të ketë AMA-n nën kontroll.
“Edi Rama do që të ketë AMA-n nën varësi. Qëndrimi i PD dhe i opozitës është që ligjet antishpifje duhet të grisen, sepse janë antikushtetuese dhe antieuropiane. Kjo është arsyeja pse këto dy ligje duhet të anulohen në mënyrë urgjente. Ne i bëjmë thirrje kryeministrit dhe qeverisë që të zbatojë opinionin e Komisionit të Venecias”, tha Vokshi.
