Ato mbajnë emra femrash. Në mos të gjitha absolute, të paktën shumica absolute e tyre. Janë uragane. Për çudi, vetë fjala “uragan” i përket gjinisë mashkullore.
Po ngremë një pikëpyetje… Mos vallë emrat e meshkujve nuk arrijnë të përcjellin urgjencën e një situate kritike, siç është ajo që sjell uragani? Pra erë e fortë e për pasojë prishje çatish, rrëzime pemësh, ngritje të dallgëve oqeanike, e marrje jetësh njerëzore.
Nëse hedhim vështrim në kohë, për t’u njohur me uraganet më të fuqishme, do vëmë re stuhitë me emra të bukur femrash, si “Irma”, “Katrina”, “Rita” e një duzinë uraganesh të tjerë, kanë vrarë njerëz. Këtu do të ngremë dhe një pyetje të dytë: Mos vallë kjo është prova e fuqisë vrasëse që një femër ka poshtë petkut të një delikatese mashtruese?
Sipas kësaj logjike meteorologët meshkuj kanë vendosur të identifikojnë frustrimin e natyrës me gjininë femërore, sepse: ose ata mund të kenë takuar femra shkatërruese në jetën e tyre, ose gratë që kanë për pjesë në shtëpi i kanë vështirë t’i mbajnë nën kontroll. Për të shkuar më tej duket se me cilësimin e uraganeve si femërore, merret dhe mesazhi se realisht njerëzit nuk duhet t’i frikësohen këtij fenomeni natyror, por vetë femrave.
Rreziku më i madh vjen nga atje ku pritet më pak. Dhe së fundi: Ky është një shkrim satirik pa kontekste diskriminuese ndaj femrës, por thjesht për t’i dhënë pak nuanca humori dëmeve të shumta që ka shkaktuar uragani i fundit femëror i mbiquajtur “Kiara”./Fjala.al
