Presidenti Ilir Meta i është rikthyer idesë së disa muajve më parë për t’i bërë thirrje shqiptarëve të dalin në një “revolucion masiv” në “mbrojtje të Kushtetutës”.
Meta kishte planifikuar ta bënte një gjë të tillë përpara muajit nëntor, kur marrëdhëniet mes tij dhe maxhorancës ishin në kulmin më të keq. Por e la në harresë këtë ide, pas tërmetit të 26 nëntorit.
Këtë herë, Meta i është rikthyer idesë duke thënë se do “i bëj thirrje të gjithë shqiptarëve të dalin në mbrojtje të Kushtetutës”.
“Presidenti i Republikës është në detyrë deri në 24 korrik 2022, në kala dhe një kështjellë e pamposhtur në mbrojtje të Kushtetutës. Le të kërkojnë çfarëdo interpretim dhe nga kushdo. Kjo histori ka marrë fund. Do i bëj thirrje të gjithë shqiptarëve të dalin në mbrojtje të Kushtetutës dhe këtë e kam bërë të qartë”, tha Meta.
“Përplasja ime do jetë ballore me këdo që prek Kushtetutën. Për këtë të jenë të sigurt të gjithë, si në mazhorancë edhe në minorancë”, u shpreh më tej presidenti Meta.
Presidenti i Republikës, deklaroi gjithashtu se Kuvendi duhet të shpërndahet, pasi nuk ofron asnjë garanci për funksionimin normal të institucioneve. Ai e ka quajtur edhe njëherë ilegjitim Kuvendin.
“Kuvendi duhet të vetëshpërndahet. Nuk ofron asnjë garanci për funksionimin normal të institucioneve. Ky është një Kuvend ilegjitim. Ju garantoj se Presidenti nuk është mur por është një kala në mbrojtje të Kushtetutës dhe nuk ka as ndonjë vagabond ndërkombëtar që mund ta vejë këtë në diskutim”, tha Meta në Euronews Albania.
