Deputeti i opozitës së re, Lefter Maliqi, duke folur për situatën problematike të rendit dhe sigurisë në vend ka sulmuar njëherësh edhe ambasadorin e Bashkimit Evropian, Luigi Sorecan.
Teksa Maliqi akuzonte ministrin e Brendshëm, Sandër Lleshaj, kryeministrin Rama, të cilët sipas tij kanë degraduar situatën e kriminalitetit në vend, deputeti Maliqi tha se edhe përfaqësuesi i BE-së është bërë njësoj si mazhoranca, kur thotë të ndjekim paratë se atje ku ka para s’ka krim dhe atje ku ka qejfe dhe pisllëqe nuk ka krim.
“Z. Ministër nuk më provokon dot. Na e bëre fushë me lule rendin dhe sigurinë në vend, sa që në kushtet e një emergjence ju bëtë një akt normativ Anti-Kçk. Z. Ministër ato zgjedhjet lokale mos i përmend më sepse ata kryetarë bashkie që keni atje, ca po ua rrahin ca po ikin nga ligji i dekriminalizimit, se i kanë vendosur ata oligarkë dhe ato banda. Thatë këtu që situata jashtë është përmirësuar, krimi është vendosur prapa hekurave e ça të them unë, disa citate e poezi që edhe në librat e Ismail Kadaresë nuk i lexon këto. Vetëm për kohët e fundit nuk di ça të thuash. Si mund ta përdorësh ti gazin lotsjellës ndaj nënave ndaj fëmijëve. Edi Rama është ministri i Brendshëm, kryepolic, kryeprokuror. Na del edhe për 100-vjetorin e Tiranës me mjekrën 1 pash si Ali Pashë Tepelena dikur. Bën humor, ku dëgjonin ambasadorët edhe me radhë. Na del edhe ky Soreca, e thotë të ndjekim paratë sepse atje ku ka para s’ka krim, atje ku ka qejfe dhe pisllëqe nuk ka krim. Kështu po bëjnë këta dhe e lanë këtë vend të zhytur në mjerim”, u shpreh Maliqi në Kuvend.
