Gjatë diskutimeve që Lëvizja Vetëvendosje zhvillonte me Lidhjen Demokratike për qeverinë e re të Kosovës, u pa se aktivistët nga Tirana nuk janë aq të pavarur dhe të shkëputur nga qendra në Prishtinë. Çdo qëndrim i partisë së Albin Kurtit transmetohej në Shqipëri nëpërmjet qëndrës që është hapur në kryeqytet, ndërkohë që drejtuesit e saj u panë në takime me Kurtin dhe drejtues të tjerë në ditët e fundit dhe vendimtare të negociatave.
E megjithatë, kryeministri Kurti vijon ta trajtojë Qendrën e Vetëvendosjes në Tiranë si autonome nga partia e tij. Në emisionin Rubikon të KTV-së, Kurti ka thënë se i takon kësaj qendre të vendosë nëse do të garojë në të ardhmen në zgjedhjet në Shqipëri apo jo.
“Ata janë qendër e Vetëvendosjes në Shqipëri, por kanë autonomi qëndrimesh dhe veprimesh. Një ditë duhet të mblidhen dhe të diskutojnë këtë gjë (pjesëmarrjen në zgjedhje në Shqipëri). Këtë gjë as nuk e përjashtoj as nuk e inkurajoj”, u shpreh ai.
Zgjedhjet e ardhshme parlamentare në Shqipëri janë në vitin 2021, ndërkohë që Qendra e Vetëvendosjes prej kohësh mban qëndrime të qarta politike.
Për t’u kthyer te Albin Kurti, ai ka mohuar gjatë intervistës se synon të bëhet kryeministër i të gjithë shqitparëve.
“Tash kur po dua t’i zvogëloj nga 21 ministri në 15, besomëni se nuk mund të mendoj as për së afërmi për gjëra të tilla. Jo, nuk kam aspirata të tilla”, u përgjigj ai.
